Strålande tur-ver, stappfullt grendahus og rikhaldig program skapte ein fin Årnesdag.
Dagen starta med ein markatur og besøk på den gamle Musters-eigedomen Trøin. Denne gong var det opne dører her, og følgjet fekk gå inn og få seg kaffe.
Så samlast ein i grendahuset, den tidlegare Årnes skule. Her var det først ei overdådig servering med bidrag frå ein raus lokal komite. Brit Smenes og Inger Haugen gjorde ypperleg kjøkenteneste.
Midlar til stadnamnmerking
Loddsalget gjekk strykande. Gunnar Nisja og Knut Kaupang styrte basaren på beste måte. Trekninga av gevinstar ville ingen ende ta, og det kom inn 12.400 kr til kulturarbeidet som Årnes-komiteen utfører.
Midlane går delvis til stadnamnmerking i Årnesmarka. Svein Årnes er databasen for dette, og Bjarne Røen har laga flotte skilt som blir sette opp. Komiteen har også fått bankmidlar til dette arbeidet.
Verbalt om kyrkjegard og kyrkjeuttrykk
Frontfigurane for Årnesdagen, Svein Aarnes og Gunn Signe Aarnes vart berømma for sin store innsats og kvitterte med forsmak på ein komande artikkel i «Årsskrift for Stangvik Historielag» - om viktige gravminne på Stangvik kyrkjegard.
Som eit kyrkjeleg apropos fortsette Bernt Bøe med dagleguttrykk med opphav i Bibelen og muntre glimt frå salmesongens historie.
Fager kveldsol
Gamleskulen var fullsett til siste plass som alltid på Årnesdagane. Og som i gamle dagar tona «Fager kveldsol» ut i salen før det bar på heimveg – og det nettopp i fagert solskin.
Servitørar: Smilande Brit Smenes (t.v.) og Inger Haugen sørga for kaffe og servering frå kjøkenet. Foto: Randi Bøe
Frontfigurarar: Gunn Signe Aarnes, Svein Aarnes og Bjarne Røen. Sistnemnde fortent vinnar av dagens hovudgevinst – eit sitteunderlag frå Inger Haugens meisterhand. Foto Bernt Bøe
