Ei stor forsamling fekk oppleve ein strålande julekonsert i Stangvik kyrkje fredag.
«Tonar i julenatt» 2024 med tre operasolistar, klaver og strykarar vart eit flott bidrag til ein årleg konserttradisjon.
Pianisten Hedda Hansen Berg, strykargruppa Trio no Treble og songarane Sigrid Vetleseter Bøe, Tonje Eero Hove og Ole Andreas Silseth serverte den eine perla meir glitrande enn den andre.
Frå dei varaste juletonar til operautdrag og «O helga natt» utløyste programmet både varme tårer og dundrande applaus.
Tenoren Ole Silseth steppa inn på kortaste varsel for sjukmelde Torstein Fossmo. Han briljerte stort, både i operaduetten «O soave fanciulla» frå Puccinis La Boheme (saman med Sigrid) og ikkje minst i ekstranummeret «O, helga natt».
Utan detaljert omtale av alt i konserten vil eg framheve noko. Tonje Hove viste lekre nyansar i «Koppången» og «Nordnorsk julesalme». Hennar og Sigrid Bøe sine stemmer smelta lekkert saman i duettar som «Jul, jul» og «Lyssna, min kära». Sigrid fekk stor applaus for «Den hellige stad», men rørte også mange med andre, mjuke soloparti.
Som alltid lokka Hedda fram det lekraste tonefølget frå flygelet uansett vanskegrad og krav til uttrykk. Hennar «Askepott» skaper ein heilt spesiell julefølelse.
Med delvis eigne arrangement viser Trio no Treble leikande musikalitet i alt dei tek for seg. Det gjeld «Morgon» av R. Strauss (saman med sopransolist Sigrid) så vel som «Santa Claus», «Mitt hjerte alltid vanker» eller «Julverset». Den siste er folketone frå nettopp Stangvik – her arrangert i dansande versjon av Lars Hølås.
Dei 150 besøkande fekk ikkje berre stemning, men også ei kulturoppleving med seg inn i julehøgtida.
Trio no Treble bestod denne kvelden av Ivan Penjin (bratsj, t.v.), Jostein Bolås Brødreskift (bass) og Eivind Rossbach Heier (cello). Foto: Randi Bøe
Utøvarane etter konserten. Frå venstre Ivan Penjn, Eivind Heier, Jostein Brødreskift, Sigrid Bøe, Tonje Eero, Hedda Hansen Berg, Ole Andreas Silseth og Bernt Bøe. Sistnemnte spela orgel til allsongen. Foto: Randi Bøe
