Av Marit Nerås Krogsæter, Gruppeleiar i Senterpartiet si fylkestingsgruppe, Møre og Romsdal

Arbeidarpartiet fremma i Stortinget forslaget om å redusere forskotsbetaling i Autopassordninga frå 3600 til 1000 for privatbilistar.

Stortinget bør svare med å fjerne heile eller redusere kraftig forskotsbetalinga for næringslivet, slik at utsette næringar ikkje må binde opp store beløp for å kunne gjere jobben sin med å frakte varer og kome seg rundt på både fylkesveg- og riksvegstrekningar.

Bedrifter som Vartdal plast, som har 50 vogntog tilgjengeleg til bruk til transport av byggevarer, mat og andre produkt, er avhengig av ferjer uavhengig kvar dei skal transportere noko, så vil ein reduksjon eller fjerning av forskotsbetaling gjere det mogleg for bedriftene å investere meir i eiga bedrift, enn å ha fleire millionar uteståande til ei kvar tid, seier Marit Nerås Krogsæter, gruppeleiar i Senterpartiet i fylkestinget og leiar av kultur-, næring- og folkehelseutvalet i Møre og Romsdal.

Møre og Romsdal er eit fylke der eit fleirtal av bedriftene og innbyggjarane er avhengige av ferjer, og som betalar bompengar i større monn enn det ein gjer i Innlandet og på det sentrale Austlandet. Likevel er det ikkje opprøret på kysten som har vore det viktige for sentrale styresmakter, det er bompengar.

Det er på tide at Stortinget tar grep og behandlar ferjene våre på lik måte som bompengar, uavhengig om det er ein fylkesveg eller riksveg ein køyrer på. Senterpartiet har tatt til orde for å redusere forskotsinnbetalinga for privatbilistar til 200 kroner og redusere innbetalinga for næringslivet, held Krogsæter fram.

Senterpartiet i Møre og Romsdal har vore svært tydeleg overfor Stortingsgruppa i Senterpartiet at reduksjon av ferjetakstar er ei viktig prioritering både i koronapakkar og permanent i Statsbudsjettet.