Viss ein vil ha fjerna den udemokratiske helseforetaksmodellen og sikre akutt og føde i Kristiansund bør ein stemme Senterpartiet.

SP har vore imot denne modellen heile tida og har fremma mange forslag om alternativ styring, men ikkje fått fleirtal. FrP har ikkje gjort noko med dette verken i eller utanfor regjering. Heller ikkje H, V eller KrF. Altså vil ei «borgarleg» regjering med støtte frå FrP aldri få gjort noko med dette. AP er hovudarkitekten bak modellen. Sterke påtrykk frå AP i Møre og Romsdal hjelpte ikkje når AP-landsmøtet skulle vedta program. Berre eit stort og sterkt SP kan i lag med Rødt og SV få AP til å snu. Om AP vil ha tilbake regjeringsmakt er det i realiteten berre SP som kan presse fram endring i sjukehuspolitikken.

Om ein vil stoppe dei politisk styrte sentraliseringsprosessane til Solberg-regjeringa, er det SP som har mest truverd. Sjølv om fleire parti no plutseleg snakkar varmt om distrikta og fremmar gamle SP-forslag som sin nye politikk (t.d. gratis ferje), er det originalen som er mest å stole på, som har lang fartstid i å forsvare distrikta og utvikle ny politikk. Som utflytting av offentlege arbeidsplassar, nasjonalt eigarskap til naturressursane, ein aktiv næringspolitikk for distrikta og nei til samanslåing til store, uhandterlege og udemokratiske einingar (t.d. kommune- og fylkesreforma).  Difor er det viktig å stemme SP.

Om ein vil jamne ut både dei økonomiske og geografiske skilnadene i landet, er SP det beste valet.

Solberg-regjeringane har vore ei tvangstrøye for oss som vil ha ei anna retning lokalt. Særleg FrP prøver å gjere eit nummer av at vi lokalt ikkje har greidd å innfri SP-politikken fullt ut, og det stemmer, fordi FrP i og utanfor regjering har gjort det umogleg. Til større gjennomslag SP får på Stortinget, til større handlingsrom blir det for SP-politikk i kommunar og fylke.

Av: Kristin Sørheim, fylkesutvalmedlem Sp