Av: Kristin Sørheim (SP), leiar i samferdselsutvalet
Om prioriteringane som Statens vegvesen foreslår for kommande NTP:
«Eg forstår at SVV har svara på ei bestilling frå tidlegare samferdselsminister Jon Georg Dale (FrP), der netto nytte av kvar krone – ut frå bestemte kriterium – skal gå framfor alt anna. Men det blir fullstendig feil når vi ser at Møre og Romsdal nesten ikkje skal få ei krone til riksvegane i den første seks-årsperioden, og sannsynlegvis lite heilt fram til 2033!»
Vidare kommentarar om enkeltprosjekt og prioriteringar:
Krabbefelt på Ørskogfjellet er inne, og 46 mill. kr til ny veg i dagen gjennom Veblungsnes (føresett 164 mill. i bompengar!) og utbetring av E 136 mellom Innfjorden og Vestnes kan nå opp opp rammene vert auka. Men innfartsveg til Ålesund og bypakke når ikkje opp, heller ikkje E 136 i Romsdalen, og ikkje Lønset-Hjelset eller Volda-tunnelen. Eller utbetring av RV 70. Utbetring og ferjeavløysing på E39 i fylket kan vi også sjå langt etter.
Dei store pengane går til sentrale strøk og nesten ikkje noko til eit av dei største verdiskapingsfylka, Møre og Romsdal. Vi har aldri sett ei slik nedprioritering av infrastrukturen i vårt fylke som i dette innspelet frå SVV. Det må vere feil politikk som er lagt til grunn når vi kan komme ut slik i vårt fylke.
Senterpartiet sitt krav er først og fremst at også fylkesvegane må inn i NTP. Vedlikehald og oppgradering av viktige og høg-trafikkerte fylkesvegar må prioriterast, med bruer og tunnelar og rassikring som det som hastar mest. Av viktige fylkesvegar for næringslivet har vi fleire, t.d. FV 60, 61, 64 og 65. Fylkesvegane utgjer langt over 40 % av vegnettet, riksvegane berre 11 %. Det hjelper ikkje med 110 km fartsgrense på E 6 og E 18, når vi ikkje kjem oss fram dit med næringstrafikken. Vi vil også prioritere eit godt og rimelegare ferjetilbod.
Så vil vi halde fast på at E 136 inkludert Veblungsnes og bypakke Ålesund må inn i første del av perioden og absolutt ikkje overførast til Nye Veier. Det er ikkje aktuelt for oss å gå inn for Nye Veier sitt forslag om ei ny løysing for E 136 utanom Åndalsnes.
Utbetring av E 39 Lønset-Hjelset og RV 70 Kristiansund og Voldatunnelen meiner vi er viktige prosjekt. Og ny E 39 forbi Batnfjorden.
Vi vil krevje meir midlar til trafikksikring og utbetring av farlege vegkryss på riksvegane, slik som mellom anna Veibustkrysset og flyplasskrysset i Ørsta.
Innspelet frå SVV om utsetjing av ferjefri og utbetra E 39 i vårt fylke står i sterk kontrast til det arbeidet som er gjort av SVV i Region Midt, så dette vil også bli prosjekt vi må løfte fram.
Dette landet skal komme seg på fote igjen etter korona-utbrotet. Da blir næringslivet i kvar «krik og krok» i Møre og Romsdal enda viktigare enn før.
Da kan vi ikkje godta at Stortinget vil la forfallet på vegane våre auke, tvert imot må vi bygge infrastruktur i ein slik situasjon, for å lette kostnader og tidsbruk for næringslivet.
