Helge Orten prøver å skremme veljarane i Romsdal og på Sunnmøre og trugar med at det ikkje vert pengar til nødvendige investeringar i Ålesund dersom føde og akutt i Kristiansund vert oppretthalde.
Vi ser dette som reint stemmefiske frå Orten, for å skape usikkerheit på Sunnmøre rundt utbygging av sjukehuset i Ålesund og drifta av Volda sjukehus. Det er det ingen grunn til, i alle fall ikkje om SP kjem i posisjon. Senterpartiet vil ha ein heilt annan finansieringsmodell for investeringar på sjukehusa, og skilje investering frå dagleg drift. Det er meir rettferdig og vil skape større rom for investeringar utan å kutte ned på drifta både før og etter investeringane.
Sjukehus skal ikkje styrast som aksjeselskap og etter reint forretningsmessige mål. Senterpartiet vil finansiere drifta av sjukehusa gjennom auka rammer til sjukehusa og med ein mindre del av inntektene styrt etter diagnose og innsatsbasert. Dagens finansieringssystem er «galemathias».
Senterpartiet har konsekvent sagt at det skal vere avdelingssjukehus i Kristiansund med akutt og føde. Senterpartiet og Arbeiderpartiet har konsekvent foreslått auka rammer til sjukehusdrifta i landet. Senterpartiet vil fjerne føretaksmodellen, som ikkje er eigna til å styre sjukehus. Vi har lansert ein alternativ modell, som har brei støtte ute. Orten treng absolutt ikkje bekymre seg for sjukehusdrifta om Senterpartiet får makt. Vi meiner det er større grunn til bekymring om Høgre får det som dei vil i helsepolitikken.
Vi veit at det blir planlagt for få sengeplassar på norske sjukehus i dag. Pandemien har vist at vi treng betre beredskap, fleire sjukehussenger og meir helsepersonell. Senterpartiet vil bidra til det, også gjennom utdanningspolitikken. Og vi ser at når det blir iverksett rekrutteringstiltak, så er det mogleg å skaffe fagfolk. Norge er kritisert fordi vi har for dårleg fødeomsorg og for få fødeavdelingar. Difor er det rett å oppretthalde funksjonar i Kristiansund også etter at fellessjukehuset på Hjelset er ferdig. Ikkje noko av dette er ein trussel for sjukehus i Volda eller Ålesund eller på Hjelset , men gir eit betre tilbod til innbyggjarane.
