Tirsdag morgon hadde eg gløymd å skru av lyden på telefonen, så eg fekk med ein gong med meg at eg hadde fått ei tekstmelding.
Det viste seg at den var ifrå banken, noko eg tenkte var overraskande. Men ingen ting var meir overraskande enn kva den faktisk innehald, og etterlot meg både skuffa og lei meg på vegne av dei som mottok denne.
«Hei! Du har ikke brukt ditt [banknamn] Mastercard på en stund. Husk at du med kredittkort fra [banknamn] får en tryggere handel både på nett og i utlandet, bedre oversikt og mer fleksibilitet i hverdagen. Sjekk nettsidene våre for enda flere fordeler. Trenger du nytt kort, bestiller du det enkelt i nett- eller mobilbanken. Vennlig hilsen [banknamn].»
Er det éin ting vi ikkje treng no føre jul, er det «påminning» om at ein ikkje har handla på kreditt! Dette er overraskande marknadsføring som gjorde meg flau på banken sine vegne.
Kor mange som fekk denne uventa meldinga i går veit eg ikkje, men eg håpar at det ikkje var mange. Vi er inne i ei dyrtid, og det siste folk treng er ei oppmoding ifrå banken om å handle på kreditt, ja i det heile å få ein sms som får det til å høyres ut som at ein får betre oversikt over økonomien av å ta opp kredittkortlån i staden for å betale for ting med ein gong.
Meldinga fekk det til å framstå som at ein går glipp av det store om ein ikkje nyttar seg av eit kredittkortlån som er innvilga for lenge sidan. Og ikkje ein stad i meldinga stod det noko om kostnaden ved å nytte seg av kredittkortet om ein ikkje kan gjere opp for seg med ein gong.
Eg er ikkje motstandar av kredittkort. Eg forstår at det er fornuftig å nytte seg av ved nokre tilfelle om ein betaler tilbake med ein gong. Og som ein ser så har eg eitt kredittkort som ikkje har blitt nytta på lang tid. Men eg er sterkt kritisk til at banken må «minne» folk på at dei har eitt kredittkort.
Gratulerer til alle som står imot kjøpepresset no i jula, og til dei som motstår freistinga til å handle over evne på kreditt!
Eg håpar at vi får gå inn i ei fredeleg jul saman, og at vi kan sjå kvarandre denne jula. Lat oss ta vare på kvarandre, og ikkje la folk føle at dei må låne pengar for å få feira jul. Julas bodskap om Jesu fødsel handlar ikkje om kjøpepress, men om ei gratis gåve gitt til alle.
Riktig velsigna jul til alle saman.
