Det nyttar lite å rette skytsen mot helseføretaka og leiarane der, slik FrP og H helst vil. Heile styringssystemet for sjukehusa må endrast. Det gjeld også finansiering av nybygg og renovering og utstyr.

Det er ikkje akseptabelt med store innsparingar i drifta både før og etter sjukehusbygginga for å dekkje kapitalkostnaden.

For å vise kor vanvittig denne modellen er: Regjeringa og Stortinget må ikkje spare på førehand for å dekkje kostnaden med eit overdimensjonert nytt regjeringskvartal eller stortingsgarasje. Forsvaret må ikkje kutte i driftsbudsjetta for å kjøpe nye jagarfly. Vi kan ikkje ha ein slik vanvittig finansieringsmodell for sjukehusa, som kanskje er dei viktigaste institusjonane for folk. Difor går vi til val på å skrote helseføretaksmodellen. Det blir ei av Sp sine viktigaste kampsaker å få gjort noko med dette. Vi har også for lenge sidan utgreia gode alternative modellar.

Vi kan heller ikkje akseptere ei ytterlegare innsparing av drifta ved Helse Møre og Romsdal for å finansiere sjukehusbygging. Regjering og Storting må no gå inn med løyvingar som gjer det mogleg å oppfylle eigne vedtak og behovet til innbyggjarane på Nordmøre og i Romsdal.

Sjukehuset på Hjelset skal byggast med alle dei planlagde funksjonane og avdelingssjukehuset i Kristiansund kan oppretthaldast med minst dei funksjonane som er planlagt så langt.

Senterpartiet går inn for at det skal vere føde- og akuttilbod ved Kristiansund sjukehus også etter at fellessjukehuset er bygd. Det er Stortinget og Regjeringa som må løyse den saka. Det er berre spel for galleriet av FrP å rette dette til Helse Møre og Romsdal, som ikkje har fått finansiering og ikkje godkjent eit slikt innhald frå H/FrP-regjeringa. Vi viser til alle forslag frå Sp i Stortinget som er nedstemt, og til vedtak i fylkesstyret for ei veke sidan. Vi vil anbefale å stole meir på Sp og Kjersti Toppe i denne saka, enn på Frank Sve.