I Møre og Romsdal er ferjene ein naturleg del av infrastrukturen vår. Anten ein bur på ei øy utan andre alternativ enn ferje for å komme seg til fastlandet, har jobben på andre sida av ein fjord, eller ein skal køyre frå Nordmøre til Sunnmøre.

Sjølv kjem eg frå Kanestraum, og her er fakta at dersom vi skal nordover i landet, så lyt vi ta ferje.

Senterpartiet har lenge arbeida for gratis ferje. I 2005 jobba tidlegare senterpartileiar Liv Signe Navarsete med å få til prøveprosjekt med gratis ferje, noko som den gong vart stemt ned av Arbeidarpartiet i regjering. I Senterpartiet sitt stortingsprogram for 2021 til 2025 står det:

Innføra ei ordning med gratis ferje og hurtigbåt for samfunn utan vegsamband til fastlandet og vurdera å gjera alle ferjesamband med under 100 000 passasjerar årleg gratis.

Halvera ferje- og hurtigbåtprisane, etter eit botnfrådrag, for alle ferjesamband med 100 000 eller fleire passasjerar årleg.

Innføra ein årleg nasjonal maksimalpris for pendlarar som er avhengige av ferje- og hurtigbåttilbodet.

Ferjer og ferjepolitikk har denne valkampen vorte til ein konkurranse; Kven vil gå lengst? Det er positivt at fleire parti endeleg har innsett kor viktig ferjene våre er, og at vi blir råka uforholdsmessig hardt i distrikta.

Likevel, kven kan du som veljar stole på, og kven bør gi di stemme til? Parti som Frp og Arbeidarpartiet som som brukar ferje som populistisk valflesk? Eller Senterpartiet som i nesten 20 år har arbeida for gratis ferjer?

Mi stemme går iallfall til eit trygt og truverdig Senterparti som ser heile landet og som har jobba for fleire avgangar og gratis billettar på ferjene våre lenge.