Straum er grunnleggande for alt vi driv med. Når vi har nok av den og den ikkje er for dyr, så tar vi den for gitt og tenker ikkje så mykje meir på det. Når straum er mangelvare vil det ganske fort bremse utviklinga i samfunnet. Det vil og bremse og stanse ei omstilling til ein meir miljøvenleg kvardag.
Mangel på straum fører også til høgare prisar og er sterkt medverkande til inflasjon. Straumbehovet er stadig aukande og alt skal elektrifiserast i namnet åt «Det grøne skiftet» og Miljørørsla. Etablering av nye arbeidsplassar i fylket har blitt stansa på grunn av mangel på straum. Næringslivet, lag og organisasjonar og private har vore offer for straumprisar som sender folk på sosialen. Men verst har det vore lenger sør og aust i landet. Kva vert gjort for å sikre nok tilgang på straum til levelege prisar? Jau, fint lite.
Det er liksom vindmøllene som skal berge oss. Straum produsert av vindmøller til havs har ein produksjonskostnad på 117 øre (NOU 2023:3) Så kjem kostnad med framføring av straum i tillegg(linjenettet). FrP har på stortinget foreslått ein makspris på 50 øre til forbrukar, noko som vil skape forutsigbarheit for alle.
I tider med høge energiprisar tener det offentlege ekstra mykje på innbyggjarane sine, og det må kome folket til gode. Produksjonskostnadane er jamt over dei same om prisen til kunden er låg eller høg. Det ligg og eit stort potensiale i fornying av eksisterande vasskraftanlegg.
Diverre ligg både skattepolitikken og regelverket i vegen for at vi skal kunne fornye desse i det tempoet som bør gjerast. Og fint lite vert gjort med det. Kjernekraft er også løysinga for å møte framtidas energiutfordringar. Rein og regulerbar energi som kan produsere straum år etter år på ein sikker og arealeffektiv måte.
I Møre og Romsdal brukar vi over dobbelt så mykje straum som vi produserer sjølv. Det trengst handling om vi ikkje skal kome i ei alvorleg knipe. Handling vil FrP syte for.
Møre og Romsdal treng både nok energi og til ein pris vi kan leve med.
