Millionane har flagra ut av fylkeskommunen på greinalause prosjekt og til vanvittige selskap slik som Bærekraft og Lyntogforum, ein kunne like godt ha fyrt på desse millionane, for meir vekkasta pengar skal ein leite lenge etter.
I dei 10–12 siste åra har det gått sport i fylkeskommunen å sløse vekk skattebetalarane sine pengar på haugevis av selskap utan mål, realisme eller meining.
No er det slutt, og FrP med det borgarlege fleirtalet i fylket ryddar opp etter 12 år med Ap- og Sp-styre av fylket.
Vi kuttar og kjem oss ut av så mange selskap som mogeleg, og kuttar sjølvsagt også mange totalt meiningslause prosjekt og program.
Men, har fylkeskommunen egentlig lært?
Nei tydelegvis ikkje, når vi ser ei totale «kortslutning» i fylkesadministrasjonen, som til dømes har løyvd pengar frå «Byen som regional motor» til Møreaksen.
Fylket har gjeve støtte til Molde kommune og Statens vegvesen for planlegging av massemottak i Molde frå «liksom» bygging av Møreaksen.
Møreaksen eit prosjekt som heldigvis er fjerna heilt ut av NTP sin 12-årsplan, er det ganglaust å sløse vekk meir skattepengar på.
Korleis fylkeskommunedirektøren kan finne på dette er for meg ubegripelig, og må egentlig berre bety at fylket enda ikkje har fått med seg kva Stortinget har slått fast i NTP.
Fylkestinget må sjølvsagt stoppe dette sløseriet, samt ein gong for alle komme seg ut av Lyntogforum og andre aldeles vanvittige luftslott.
Ryddejobben er i gang, og fylkestinget vil i oktober gå ut av mange selskap, slik som til dømes Møreaksen AS.
Ikkje ein dag for tidleg!
