Ved framlegginga av nasjonal helse- og samhandlingsplan seier regjeringa at dei vil at kommunar og sjukehus skal prøve ut og innføre nye organiseringsformer for å sikre samanhengande tenester med god bruk av kompetanse og personell.

Regjeringa vil opprette eit varig rekrutterings- og samhandlingstilskott som skal gjere det enklare å samarbeide om planlegging, tenesteutvikling og gode pasientforløp. Dei vil også prøve ut kombinerte stillingar på tvers av kommunar og sjukehus.

Regjeringa vil innføre eit rekrutterings- og samhandlingstilskott, og helseføretak og kommunar skal bli einige om korleis midlane skal brukast. Opptaksområdet til dei minste sjukehusa – både akuttsjukehus og sjukehus utan akuttfunksjonar skal prioriterast.

Nesten alle kommunane på Nordmøre har tidvis for liten kapasitet og kompetanse til å ta imot utskrivingsklare pasientar frå sjukehuset så snart sjukehusa meiner dei er ferdigbehandla. Sjukehuset på Hjelset får sikkert enda mindre rom for å halde igjen pasientar som dei meiner skal tilbake til kommunen. Det er enda ikkje avklara kva som skal fylle sjukehuset i Kristiansund, men her må det ligge til rette for eit slikt varig tilskott til nye organiserings- og samhandlingsformer som regjeringa etterlyser.

Annonse

Annonse

Viss alle kommunane og helseføretaket går saman og finansierer opp fleire døgnplassar, vil det lette presset på nye SNR, det vil avlaste kommunane den tida dei treng til å ha klar pasientplass heime.

Det vil styrke DMS-et i Kristiansund og sikre sengeplassar som også ortopedien (protesekirurgien) kan nytte seg av, og det vil utløyse samarbeid om kompetanse og betre rekrutteringa til både DMS-et og kommunane fordi det blir ein interessant og utfordrande arbeidsplass, der også aktiviteten til Helseinnovasjonssenteret må koplast inn.

I tillegg vil det vere eit viktig beredskapstiltak for både helseføretaket og kommunane – den dagen det trengst fleire sengeplassar med døgnbemanning. Går det an å få med Helse Midt og Helse Møre og Romsdal og kommunane på Nordmøre til å utvikle og søke om eit slikt prosjekt? Tida er no!