I ei uroleg tid med auka prisar og renter legg regjeringa fram eit ansvarleg og trygt budsjett, som stiller opp for dei som treng det mest og bidreg til at barn og unge for delta i meiningsfulle fritidsaktivitetar.
Endå ein gong sikrar Ap/Sp-regjeringa full momskompensasjon til frivilligheita og idretten, deira viktigaste krav. På den måten bidreg vi til at over 22 000 organisasjonar kan halde fram med aktiviteten sin og inkludere fleire barn og unge i viktige fellesskap over heile landet.
Ordninga blir styrkt med 415 millionar kroner i statsbudsjettet for 2024 til totalt 2,440 milliardar kroner. Forslaget er heile 690 millionar kroner høgare enn i det siste budsjettet til høgreregjeringa.
I tillegg legg vi til rette for at det blir bygd idrettsanlegg i heile landet, vi sikrar meir pengar til frivilligsentralane og vi held fram innsatsen for å sikre deltaking og inkludering av barn og unge i fritidsaktivitetar. Vi går no i gang med å lage ein handlingsplan med innspel ifrå heile landet, der målet er at alle barn og unge skal få like høve til å delta i kultur- idretts- og friluftsliv for uavhengig av økonomi og bakgrunn. Handlingsplanen kjem i tillegg til dei 125 millionar kronene frå spelemidlane som vart gitt som ein ekstrainnsats for å få opp deltaking og inkludering i idrettslag tidlegare i år.
Så er eg stolt av at Ap/Sp-regjeringa sørgjer for vår tids største velferdsreform, i alle fall sidan barnehageforliket i 2003, nemleg 1000 kroner billigare barnehageplass for alle barn! Enkelte plassar heilt opp mot 1500,- billigare barnehage. Berre på dette eine enkelttiltaket kan ein barnefamilie med to barn i barnehagen spare 23 000 kroner i året, samanlikna med det siste statsbudsjettet til høgreregjeringa. Dette er pengar som ikkje kjem av seg sjølv, men av sosialdemokratisk politikk.
Når mange no merkar høgare prisar og renter i kvardagen er det viktig å sikre gode velferdstenester for alle, ikkje for nokre få. Vi skal stille opp for dei som treng det mest. Vi skal bidra til tryggleik for alle og moglegheiter for folk og bedrifter over heile landet. Arbeidsløysa er låg, det er rekordmange i jobb, og prisveksten vil truleg gå ned neste år. Vi er på rett veg.
