Roms-Dahl er ute og ROR i stormen som no blæs på Nordmøre.

Trur du at du kan gå på vatnet, kanskje? Her har du nok tatt deg vatn over hovudet om du trur du klarer å stille denne stormen, Roms-Dahl!

Det skal meir til enn "omsut" for naboane i nord no, som berre baserer seg på lett gjennomskueleg eigeninteresse. Eg såg forresten at du var i operaen i Kristiansund nyleg. Er det ikkje snart på tide at også Molde får sin eigen opera? Det er mykje god helse i god opera, veit du.

Så kan vi kanskje rehabilitere og behalde dei sjukehusa vi har? Så slepp vi å reise så langt når vi blir sjuke eller skal føde? Du har vel fått med deg at det no har poppa opp geriljagrupper som vil forsvare fødeavdelinga i Kristiansund? Bunadsgeriljaen kallar dei seg. Men la deg ikkje lure, Roms-Dahl! Kven veit kva desse geriljakrigarane har under bunaden?

Forresten, det er uhorveleg med stridigheiter, sjalusi og drap i desse operaførestillingane. Og det har vi vel nok av i det verkelege livet. Til og med pistolskot som skræmer vatnet av tilskodarane! Så det med opera var kanskje ein dårleg ide. Og teaterscener der det blir spelt komedie manglar heller så visst ikkje!

Så vi har det kanskje ikkje så verst som vi har det? Teppefall. Men applaus?